Jabuuti oo berri u dareereysa doorashada, iyadoo Madaxweyne Ismaaciil Cumar Geelle si weyn loogu arko musharraxa ugu cadcad guusha, kadib tobannaan sano oo hoggaan iyo horumar qaran ah.
Doorashadan waxay ka tarjumaysaa sii-jiritaanka hoggaan ay dad badani ku kalsoon yihiin, hoggaankaas oo muddo dheer horseeday koboc dhaqaale iyo xasillooni ka hanaqaadday gobol istaraatiiji ah.
Labadii toddobaad ee la soo dhaafay, ololaha doorashadu wuxuu gaaray guud ahaan dalka, laga bilaabo caasimadda Jabuuti ilaa xarumaha gobollada sida Tajourah iyo Obock. Xisbiga talada haya ee UMP (Union for the Presidential Majority), oo uu hoggaamiyo Madaxweyne Geelle, ayaa muujiyay awood qaran oo ballaaran, isaga oo qabtay isu-soo-baxyo si weyn loo soo xaadiray iyo olole abaabulan oo gaadhay meelo kala duwan.
Madaxweyne Ismaaciil Cumar Geelle, oo xilka hayay tan iyo 1999-kii, wuxuu weli yahay shakhsiga ugu saameynta badan nolosha siyaasadeed ee Jabuuti. Mudadii uu xilka hayay waxaa la hirgeliyay mashaariic waaweyn oo kaabayaal dhaqaale ah, oo ay ka mid yihiin ballaarinta dekedaha iyo shabakadaha gaadiidka, taas oo Jabuuti ka dhigtay xarun muhiim u ah ganacsiga iyo saadka Geeska Afrika.
Taageerayaashiisu waxay ku ammaanaan Madaxweyne Geelle koboca dhaqaale ee joogtada ah, kordhinta maalgashiga shisheeye, iyo doorka dalka ee ah lammaane xasilloon oo ku sugan deegaan juqraafi-siyaasadeed adag. Goobta istaraatiijiga ah ee Jabuuti ayaa u saamaxday inay isu beddesho marin muhiim u ah ganacsiga gobolka.
Hannaanka dhaqaale ee Jabuuti ku socotay intii uu xilka hayay madaxweynaha talada haya waa mid adag in la iska indho tiro. Iyadoo loo arko albaabka laga galo Geeska Afrika, dalku wuxuu juqraafi ahaan uga faa’iidaystay maalgashi joogto ah iyo miisaan siyaasadeed oo sii kordhaya, hase yeeshee, doorashooyinku kuma koobna oo keliya waxqabadkii hore. Waxay sidoo kale ku saabsan yihiin fursadaha mustaqbalka. Halkaas ayaana ah goobaha muhiimka ee ololaha uu diirada saarayay.
Hoggaamiyaha xisbiga mucaaradka ah ee CDU, Maxamed Faarax Samatar, ayaa muujiyay kalsooni uu ku sheegayo inuu samayn karo guul lama filaan ah, haddana guud ahaan mucaaradku weli waa kala qaybsan yahay. Iyadoo aysan jirin awood mideysan ama isbahaysi beddel dhab ah soo bandhigi kara, waxaa xaddidan awoodda mucaaradku u leeyahay inuu niyad-jabka jira u beddelo awood doorasho oo wax ku ool ah.
Tirooyinku waxay xoojinayaan xaqiiqadan. Dadka diiwaangashan ee codbixinta ayaa wax yar ka badan 243,000, halka ka-qaybgalka doorashadu caadi ahaan gaaro qiyaastii 67 boqolkiiba. Tani waxay muujinaysaa in shacabka Jabuuti ay si dhab ah uga qayb qaataan geeddi-socodka dimuqraadiyadeed.
Joogitaanka 76 kormeerayaal caalami ah, oo ay ku jiraan ergooyin ka socda Ururka Iskaashiga islaamka, Midowga Afrika iyo IGAD, waxay muujinaysaa dadaal lagu doonayo in lagu xaqiijiyo habraaca doorashada.
saadaalin la qaaday ayaa tilmaamaysa in shacabka jabuuti ay si aad ah ugu qanacsanyihiin hoggaanka Madaxweyne Ismaaciil Cumar Geelle, waxaana la filayaa in guddiga doorashada ay natijada ku dhawaaqaan fiidka habeenka Jimcada ama galinka hore ee maalinta sabtida.
